ரிஷபம்

எதையும் ஆற அமர யோசித்து முடிவெடுக்கும் நீங்கள், பழி பாவத்திற்கு அஞ்சி நேர்பாதையில் செல்பவர்கள். நுண்ணறிவும், பேச்சு சாதூர்யமும், எடுத்த  வேலையை முடிக்கும் வல்லமையும் கொண்ட நீங்கள், மாடாக உழைத்து ஓடாகத் தேய்பவர்கள். உங்களுக்கு இந்த ராகுவும், கேதுவும் இணைந்து 27.7.2017 முதல்  13.02.2019 வரையுள்ள காலகட்டங்களில் எப்படிப்பட்ட பலன்களை தரப்போகிறார் என்பதை பார்ப்போம்.

ராகுவின் பலன்கள்:

இதுவரை உங்களின் ராசிக்கு நான்காம் வீட்டில் அமர்ந்திருந்து உங்களை பல பிரச்னைகளிலும் மூழ்கடித்து எதையுமே முழுமையாக யோசிக்க முடியாமல்  திணறடித்தாரே! தாயாருக்கு ஆரோக்ய குறைவையும், அவருடன் பிரிவையும், கசப்புணர்வுகளையும் தந்தாரே! அடுக்கடுக்காக வீடு, வாகனப் பராமரிப்புச்  செலவுகளையும் கொடுத்தாரே! அப்படிப்பட்ட ராகுபகவான் இப்பொழுது உங்களுடைய ராசிக்கு 3ம் இடத்திற்கு வந்தமருவதால் இனி சவால்களில் வெற்றி  பெறுவீர்கள். மாதக் கணக்காக கிடப்பிலிருந்த காரியங்களையெல்லாம் ஒவ்வொன்றாக முடித்துக் காட்டுவீர்கள். கழுத்தை நெறிக்குமளவிற்கு கடன் பிரச்னையில்  தவித்தீர்களே! அவற்றையெல்லாம் பைசல் செய்யுமளவிற்கு பணவரவு உண்டு.

வரவேண்டிய பணமும் கைக்கு வரும். வி.ஐ.பிகளை சரியாகப் பயன்படுத்தி முன்னேறுவீர்கள். பேச்சில் அனுபவ அறிவு வெளிப்படும். ஷேர் லாபம் தரும். சோர்ந்து  போயிருந்த உங்கள் முகத்தில் இனி புன்னகை தவழும். தாயாருடனான மோதல்கள் நீங்கும். அவருக்கிருந்த மூட்டு வலி, சர்க்கரை நோய் வெகுவாகக் குறையும்.  உடல்நலம் சீராகும். கணவன்  மனைவிக்குள் ஈகோவால் இருந்த இடைவெளி குறையும். தாம்பத்யம் இனிக்கும். குழந்தை பாக்யம் கிட்டும். பிள்ளைகளின்  வருங்காலத்திற்காக சேமிக்கத் தொடங்குவீர்கள். நகர எல்லையை ஒட்டியுள்ள பகுதியில் வீட்டு மனை வாங்கும் யோகம் உண்டாகும்.

உதாசீனப்படுத்திய உறவினர்களெல்லாம் உங்களின் பெருந்தன்மையைப் புரிந்து கொள்வார்கள். பெரிய நோய் இருக்குமோ என்ற பயம் விலகும். கனவுத்  தொல்லையால் அவ்வப்போது தூக்கமில்லாமல் போனதே இனி ஆழ்ந்த உறக்கம் வரும். இளைய சகோதர வகையில் சில நேரங்களில் மனஸ்தாபங்கள்  வந்தாலும் பாசம் குறையாது.  வீட்டில் தடைபட்டு வந்த சுப நிகழ்ச்சிகளெல்லாம் அடுத்தடுத்து நடந்தேறும். அரைகுறையாக நின்று போன வீடுகட்டும் பணியைத்  தொடங்க வங்கிக் கடனுதவி கிடைக்கும். விரைந்து முடித்து கிரகப் பிரவேசம் செய்வீர்கள். சிலர் இருக்கும் வீட்டை விரிவுபடுத்திக் கட்டுவீர்கள். தள்ளிப் போன  வழக்கில் நல்ல தீர்ப்பு வரும். அதிகாரப் பதவிக்கு தேர்ந்தெடுக்கப்படுவீர்கள்.             

ராகுபகவானின் நட்சத்திர சஞ்சாரம்:

உங்களின் தன  பூர்வ புண்யாதிபதியான புதனின் ஆயில்யம் நட்சத்திரத்தில் 27.7.2017 முதல் 4.4.2018 வரை ராகுபகவான் செல்வதால் புதிய சிந்தனைகள்  உதயமாகும். பிள்ளைகளால் அந்தஸ்து உயரும். பூர்வீகச் சொத்தை விரிவு படுத்தி, அழகுபடுத்துவீர்கள். மகளுக்கு நல்ல வரன் அமையும். குடும்பத்தினருடன்  சென்று குலதெய்வப் பிரார்த்தனையை நிறைவேற்றுவீர்கள். 5.4.2018 முதல் 10.12.2018 வரை ராகுபகவான் உங்களின் யோகாதிபதியான சனிபகவானின் பூசம்  நட்சத்திரத்தில் செல்வதால் திடீர் திருப்பங்கள் உண்டாகும். தந்தையாரின் ஆரோக்யம் சீராகும்.

பாகப்பிரிவினை சுமூகமாக முடியும். புது பதவி, பொறுப்புகளுக்கு தேர்ந்தெடுக்கப்படுவீர்கள். நவீன ரக வாகனம் வாங்குவீர்கள். புது வேலைக்கு முயற்சி  செய்தீர்களே! நல்ல பதில் வரும். தொழிலதிபர்களின் நட்பு கிடைக்கும்.  உங்களின் அஷ்டமலாபாதிபதியான குருபகவானின் புனர்பூசம் நட்சத்திரம் 4ம் பாதம்  கடக ராசியில் 11.12.2018 முதல் 13.2.2019 முடிய ராகுபகவான் பயணிப்பதால் வீண் அலைச்சல், பணப்பற்றாக்குறை, மூத்த சகோதர வகையில் கருத்து மோதல்,  சிறுசிறு விபத்து வந்து நீங்கும். அரசு விவகாரங்களில் அலட்சியம் வேண்டாம்.

கன்னிப் பெண்களே! காதலில் குழப்பம், கல்வியில் தோல்வி, கல்யாணத்தில் தடை என அடுக்கடுக்கான பிரச்சனைகளால் நிலைக் குலைந்து போனீர்களே! இனி  உங்களுக்கு நல்லதே நடக்கும்.

மாணவ, மாணவிகளே! எண்ணங்கள் பூர்த்தியாகும். வகுப்பறையில் அமைதி காப்பதுடன், படிப்பில் ஆர்வம் காட்டுவீர்கள். உயர்கல்வியில் வெற்றி பெற்று  பெற்றோரை பெருமைப்படுத்துவீர்கள்.

அரசியல்வாதிகளே! தலைமையுடனான மோதல்கள் குறையும். கட்சியில் மதிப்புக் கூடும். சகாக்கள் உங்களுடைய ஆலோசனைகளை ஏற்றுக் கொள்வார்கள்.

கலைத்துறையினரே! வெளிநாட்டு நிறுவனத்திலிருந்து அழைப்பு வரும். யதார்த்தமான படைப்புகளை வெளியிட்டு அனைவரின் கவனத்தையும் ஈர்ப்பீர்கள்.  ரசிகர்களின் எண்ணிக்கை அதிகமாகும். உங்களுடைய கற்பனைத் திறன் வளரும்.

விவசாயிகளே! நெல், கரும்பு சாகுபடியாலும், கீரை வகைகளாலும் உங்கள் வருவாய் உயரும். இயற்கை உரங்களுக்கு முக்கியத்துவம் தருவீர்கள். மோட்டார் பம்பு  செட்டை மாற்றுவீர்கள்.

வியாபாரிகளே! கடந்த காலத்தில் ஏற்பட்ட நஷ்டங்களையும், போட்டிகளையும் சமாளிக்க முடியாமல் திணறினீர்களே! இனி அவற்றையெல்லாம் சரி செய்து  முன்னேறுவீர்கள். பழைய பாக்கிகளெல்லாம் வசூலாகும். வாடிக்கையாளர்களின் ரசனைக்கேற்ற பொருட்களை கொள்முதல் செய்து லாபத்தை பெருக்குவீர்கள். .

உத்யோகஸ்தர்களே! அதிகாரிகளின் பலம் எது பலவீனம் எது என்பதை உணர்ந்து அதற்கேற்ப உங்களின் நடவடிக்கைகளை மாற்றிக் கொள்வீர்கள். சக  ஊழியர்களின் ஒத்துழைப்பால் தேங்கிக் கிடந்த வேலைகளை விரைந்து முடிப்பீர்கள்.
     
கேதுவின் பலன்கள்:

இதுவரையில் உங்கள் ராசிக்கு பத்தாமிடத்தில் அமர்ந்து கொண்டு எந்த வேலைகளையும் முழுமையாக செய்ய விடாமல் முடக்கிப் போட்டதுடன், உத்யோகத்தில்  அடிக்கடி இடமாற்றங்களையும், வீண் பழிகளையும் தந்து உங்களுடைய திறமைக்கு அங்கீகாரமும் இல்லாமல் செய்த கேது பகவான் இப்போது உங்களது ராசிக்கு  9ம் வீட்டில் வந்தமர்வதால் தன்னம்பிக்கை அதிகரிக்கும். வேலைச்சுமை குறையும். தோல்வி மனப்பான்மையிலிருந்து விடுபடுவீர்கள். பெரிய மனிதர்களின் நட்பு  கிடைக்கும்.

கேதுபகவானின் நட்சத்திர சஞ்சாரம்:

27.7.2017 முதல் 29.11.2017 வரை உங்களின் சப்தம  விரயாதிபதியான செவ்வாயின் அவிட்டம் நட்சத்திரம் 1, 2ம் பாதம் மகர ராசியில் கேதுபகவான் செல்வதால்  இக்காலக்கட்டங்களில் எதிர்பாராத திடீர் முன்னேற்றம் உண்டு. பணப்புழக்கம் அதிகரிக்கும். அலைச்சல் குறையும். சகோதரர் சாதகமாக இருப்பார். சொத்து சேரும்.  கமிஷன் வகைகளால் ஆதாயமடைவீர்கள். மனைவி பக்கபலமாக இருப்பார். அவருக்கு வேலை கிடைக்கும். உங்களின் திருதியாதிபதியான சந்திரனின்  திருவோணம் நட்சத்திரத்தில் 30.11.2017 முதல் 06.08.2018 வரை கேது செல்வதால் உங்களின் ரசனை மாறும். ஆளுமைத்திறன் அதிகரிக்கும்.

7.08.2018 முதல் 13.2.2019 வரை உங்களின் பூர்வ புண்யாதிபதியான சூரியனின் உத்திராடம் நட்சத்திரம் 2, 3, 4ம் பாதம் மகர ராசியில் கேது செல்வதால்  பெற்றோரின் உடல்நிலை பாதிக்கும். வியாபாரத்தில் தொலைக்காட்சி, வானொலி விளம்பர யுக்திகளை கையாண்டு லாபம் ஈட்டுவீர்கள். வேலையாட்கள்,  பங்குதாரர்களின் ஒத்துழைப்பு சுமாராக இருக்கும். அரசுக்குச் செலுத்த வேண்டிய வரிகளை குறித்த காலகட்டங்களில் செலுத்திவிடுவது நல்லது. இந்த ராகு  கேது  மாற்றத்தில் கேதுவால் சின்னச் சின்ன தடங்கல்கள் வந்தாலும், ராகுவின் அனுகிரகத்தால் எங்கும் எதிலும் சாதிப்பீர்கள்.  

பரிகாரம்:

வேலூர் மாவட்டம், திருவலம் தலத்தில் அருளும் வில்வநாதீஸ்வரரை தரிசித்து வாருங்கள். ஏழைப் பெண்ணின் திருமணத்திற்கு உதவுங்கள்.