மேஷம்

15-5-26 முதல் 14-6-26 வரை

தைரியத்துடன் செயல்படும் மேஷ ராசி அன்பர்களே, உங்கள் ராசிநாதன் செவ்வாய் பகவான் உங்கள் ராசியிலேயே பலம் பெற்று சஞ்சரிப்பதால் எல்லா வகையிலும் நல்ல மாற்றமும் முன்னேற்றமும் ஏற்படும். ஆளுமை திறன் அதிகரிக்கும். புதன் 2ல் சஞ்சரிப்பதால் எந்த விஷயத்தையும் நாசுக்காக கையாளுங்கள். குடும்பத்தில் ஒருவருக்கொருவர் விட்டுக் கொடுத்துச் செல்வது நல்லது. மனதில் எதிர்காலம் பற்றிய பயம் வந்து நீங்கும். தன்னம்பிக்கையும் தைரியத்தையும் வளர்த்துக் கொள்ளுங்கள். தாயால் அனுகூலமான பலன்கள் ஏற்படும். வீடு வாகனம் சொத்து தொடர்பான விஷயங்கள் சாதகமாக அமையும். 5ல் கேது இருப்பதால் குழந்தைகள் உடல் நலனில் கவனம் தேவை. அவர்களின் நட்பு வட்டத்தை கண்காணிப்பில் வைத்து வழிநடத்திச் செல்வது நல்லது. நீண்ட நாளாக எதிர்பார்த்த வங்கி கடன் தற்போது கிடைக்கும். கணவன் மனைவிக்குள் அன்பும் ஆதரவும் அதிகரிக்கும். வியாபாரத்தில் கூட்டாளிகளால் ஆதாயம் உண்டு. புதிய வியாபாரம் முயற்சிகள் கைக்கூடும். எடுக்கும் முயற்சிகளில் தடை தாமதம் ஏற்பட்டாலும் விடாமுயற்சி வெற்றி தரும். குரு 9 ஐ பார்ப்பதால் தந்தையால் அனுகூலமான பலன்கள் ஏற்படும். பிதுர் வழி சொத்து விஷயங்கள் சாதகமாக அமையும். குரு மற்றும் மூத்தோரின் ஆசி கிடைக்கும். தொழில் மற்றும் உத்யோகத்தில் உயர்வு ஏற்படும்.12 ல் சனி இருப்பதால் யாரையும் நம்பி ஜாமீன் கையெழுத்து போட வேண்டாம். எதிலும் பொறுமை, நிதானம், விழிப்புணர்வு தேவை.

சந்திராஷ்டம நாட்கள்: மே 30, ஜூன் 1, 2.

பரிகாரம்: குக்கே சுப்பிரமணிய சுவாமியை செவ்வாய்க்கிழமையில் சென்று வழிபட்டுவர எதையும் வெல்லும் ஆற்றல் கிடைக்கும்.