(31.7.2025 முதல் 6.8.2025 வரை)

சாதகங்கள்: ஒன்பது கிரகங்களில் பாதிக்கு பாதி அதாவது நான்கு கிரகங்கள் உங்களுக்குச் சகாயம் செய்யும் நிலையில் இருக்கின்றன. அதுவும் குறிப்பாக சுப கிரகங்களான குருவும் சுக்கிரனும் உங்கள் பஞ்சம ஸ்தானத்தில் இருக்கிறார்கள். புதனும் சூரியனும் சத்துரு ருண ரோகஸ்தானத்தில் இருப்பது சிறப்பு. அரசாங்க அனுகூலம் உண்டு. வேலைவாய்ப்பு தேடுபவர்களுக்கு நல்ல வேலை கிடைக்கும். தகவல் தொழில்நுட்பத் துறையில் உள்ளவர்களுக்கு உத்தியோக முன்னேற்றம் உண்டு. ஆசிரியர் தொழில், ஆடிட்டர் தொழிலில் உள்ளவர்களுக்கு முன்னேற்றம் தரும் வாய்ப்புகள் கிடைக்கும். கலைத்துறை சிறப்பாக இருக்கும். பொருளாதார முன்னேற்றம் உண்டு. குடும்ப பிரச்னைகள் கட்டுக்குள் இருக்கும். சனி ராகு தோஷம் சற்று குறையும்.

கவனம் தேவை: ராசியில் சனி வக்கிரமாக இருப்பதும் ராகு இணைந்து இருப்பதும் ஏழாம் இடத்தில் மற்றொரு பெற்ற சர்ப்ப கிரகமான கேது அமர்ந்து உங்கள் ராசியைப் பார்ப்பதும் செவ்வாய் அஷ்டமச் செவ்வாயாக இருந்து உங்கள் தன லாப ஸ்தானத்தைப் பார்வையிடுவதும் சிறப்பான பலன்களைத் தராது. ரியல் எஸ்டேட் துறைகளில் கடுமையான பின்னடைவு இருக்கும். சகோதர உறவுகள் கருத்து வேறுபாடுகளைத் தந்து மன அமைதியைக் குறைக்கும். எதிலும் கவனமும் பொறுமையும் இந்த நேரத்தில் தேவை.

சந்திராஷ்டமம்: 28.7.2025 பகல் 12.00 முதல் 31.7.2025 காலை 11.15 வரை சந்திராஷ்டமம் உண்டு. பேச்சில் கவனமாக இருக்கவும். வாதப்பிரதி வாதங்களில் ஈடுபடவேண்டாம்.

பரிகாரம்: குலதெய்வக் கோயிலுக்கு ஒருமுறை சென்று வாருங்கள். சனிக்கிழமை தோறும் நவகிரக சந்நதிக்குச் சென்று பிரார்த்தனை செய்து வாருங்கள். நல்லது நடக்கும்.