(20.11.2025 முதல் 26.11.2025 வரை)

சாதகங்கள்: ஆன்மிக விஷயங்களில் கவனம் செலுத்தும் வாய்ப்பு உண்டு. அதுவே இப்பொழுது உள்ள நிலையில் உங்களுக்கு பிரச்னைகளைத் தீர்க்கும் மருந்தாக அமையும். வாரத்தின் முதல் ஐந்து தினங்கள் சுக்கிரன் ஆட்சி வீட்டில் சஞ்சரிப்பதால் பணப்பிரச்னைகள் கட்டுக்குள் இருக்கும். பெரிய அளவில் பற்றாக்குறை ஏற்படாது. நான்காம் இடத்தில் செவ்வாய் ஆட்சியில் இருப் பதாலும் சூரியனோடு இணைந்து இருப்பதாலும் வீடு மனை முதலிய முதலீடுகள் ஓரளவு லாபத்தைத் தரும். பொது வாழ்வில் உள்ளவர்களுக்கு எதிர்பாராத வகையில் சில பொறுப்புகள் கிடைக்கும். பயணங்கள் சாதகமாக இருக்கும்.

கவனம் தேவை: பல கிரக நிலைகள் உங்களுக்கு அனுகூலமாக இல்லாததால் எந்த விஷயமாக இருந்தாலும் நிதானத்தை கடைப்பிடிக்க வேண்டும். அதிகாரிகளோடு தேவையற்ற வாக்குவாதத்தைத் தவிர்க்கவும். எதிர்பார்த்த உதவி கிடைப்பதில் தாமதமாகும். நம்பி ஒப்படைத்த பொறுப்புக்கள் உங்களுக்கு மனக்கசப்பைத் தரலாம். உஷ்ண நோய்களும் சரும வியாதிகளும் சஞ்சலத்தைத் தரலாம். சுபமுயற்சிகளில் தடைகள் இருக்கின்றன.

பரிகாரம்: வியாழக்கிழமை தட்சிணாமூர்த்தியை வழிபடுங்கள். சூரியனையும் வழிபடுங்கள்.