கடகம்

14-5-2024 முதல் 14-6-2024 வரை

(புனர்பூசம் 4ம் பாதம் முதல் பூசம், ஆயில்யம் வரை)

குடும்பம்: சனி பகவான், ெசவ்வாய், ராகு ஆகிய மூவரைத் தவிர, மற்ற அனைத்து கிரகங்களும் உங்களுக்கு ஆதரவாக சஞ்சரிக்கின்றனர், இம்மாதம் முழுவதும்!! வைகாசி 7-ம் தேதியிலிருந்து, சுக்கிரனும் உங்களுக்குச் சாதகமாக மாறிவிடுகிறார். வருமானம் திருப்திகரமாக நீடிக்கிறது. வீண் செலவுகள் கட்டுக்கடங்கியே இருக்கும். கணவர் – மனைவியரிடையே அந்நியோன்யம் ஓங்கும். சொந்த வீடு வேண்டுமென்ற உங்களது நெடுநாளைய ஆசை, இம்மாதம் நிறைவேறும். லாப ஸ்தானத்தில் குரு பகவான் சிறந்த சுப பலம் பெற்றிருப்பதால், திருமண முயற்சிகள் எளிதில் நிறைவேறும். மனதிற்கு நிறைவையளிக்கும் வரன் அமையும். கர்ப்பிணிப்பெண்மணிகளுக்கு, சுகப் பிரசவம் ஏற்படும். குரு பூரண சுப பலம் பெற்று இருப்பதால், இம்மாதம் குழந்தைகளில் பெரும்பாலும் ஆண் குழந்தைகளாகவே இருக்கும் (ஆதாரம்: “பூர்வ ஜென்ம நிர்ணய ஸாரம்”). உத்தியோகம் காரணமாக, வெளிநாடு சென்றுள்ள பெண் அல்லது பிள்ளை தாய்நாடு திரும்புவர். குடும்பத்தில் இது அளவற்ற மகிழ்ச்சியை ஏற்படுத்தும்.

உத்தியோகம்: அஷ்டம ராசியில், பலம் வாய்ந்த சனி பகவான் அமர்ந்திருப்பதால், பணிச் சுமையும், பொறுப்புகளும் உங்கள் சக்திக்கு சோதனையாக அமையும். ஒருசிலருக்கு, இடமாற்றமும், பதவியில் மாற்றமும் ஏற்படும். மேலதிகாரிகளுடன் கருத்து வேற்றுமையைத் தவிர்ப்பது அவசியம். அன்றாடக் கடமைகளில் பொறுமை, நிதானம் அவசியம். சக-ஊழியர்களின் சொந்தப் பிரச்னைகளில் உங்களை இணைத்துக் கொள்ள வேண்டாம். நண்பர்களுக்கு உதவி செய்வதாக நினைத்துக் கொண்டு, அவர் வாங்கும் கடன்களுக்கு, பிணைக் கையெழுத்திட வேண்டாம் என்பதை கிரக நிலைகள் தெள்ளத் தெளிவாக எடுத்துக்காட்டுகின்றன. நம் வாழ்க்கையில் எப்போதெல்லாம் இக்கட்டான பிரச்னைகள் ஏற்படக்கூடும் என்பதை முன்கூட்டியே நமக்கு எச்சரிக்கை செய்து, நம்மைக் காப்பாற்றுவதில், ஜோதிடத்திற்கு இணையான சக்தி வேறொன்று இந்த அகிலத்தில் கிடையாது.

தொழில், வியாபாரம்: போட்டிகள் அனைத்தையும் முறியடித்து, விற்பனையைப் பலமடங்கு அதிகரிப்பதற்கு கிரக நிலைகள் மிகவும் ஆதரவாக சஞ்சரிக்கின்றனர். அளவோடு புதிய முதலீடுகளில் ஈடுபடலாம். அரசாங்க ஆதரவு எளிதில் கிட்டும் என்பதை சூரியனின் நிலை எடுத்துக்காட்டுகிறது. தொழிலை அபிவிருத்தி செய்வதற்கு, புதிய விற்பனை நிலையங்களைத் திறப்பதற்கும் ஏற்ற மாதம் இது. நிதி நிறுவனங்களின் ஆதரவும், ஒத்துழைப்பும் கிடைக்கும். சந்தை நிலவரம் கைகொடுக்கும்.

கலைத்துறையினர்: சுக்கிரன், குரு, புதன், கேது ஆகிய நால்வரும் சுப பலம் பெற்று வலம் வருவதால், கர்நாடக சங்கீத வித்வான்கள், நாதசுரக் கலைஞர்கள், சிற்பக் கலைஞர்கள், ஆன்மிகச் சொற்பொழிவாளர்கள், பரதநாட்டியக் கலைஞர்கள் ஆகியோர் சிறந்த முன்னேற்றத்தை அடைவார்கள். வருமானம் உயரும். இதனை அனுபவத்தில் பார்க்க முடியும்.

அரசியல்துறையினர்: சம்பந்தப்பட்ட கிரகங்கள் அனுகூலமான ராசியில் சஞ்சரிப்பதால், அரசியல் துறை அன்பர்களுக்கு, அனுகூலமான மாதமிது. இருப்பினும், அஷ்டம ராசியில், சனியும், பாக்கிய ஸ்தானத்தில் ராகுவும் அமர்ந்திருப்பதால், சிறு, சிறு வழக்குகளில் அகப்பட்டுக்கொண்டு, பின்பு நீதிமன்றம் மூலம் வெளிவருவதற்கு சாத்தியக்கூறு உள்ளது. பேச்சிலும், செயலிலும், நிதானமாக இருத்தல் வேண்டும். சனி, செவ்வாய், ராகு ஆகியோரின் சஞ்சார நிலைகள் தோஷத்தை உண்டுபண்ணுவதால், உங்களை மறந்து, தகாத வார்த்தைகளை உபயோகித்துவிட சாத்தியக்கூறுகள் உள்ளதை கிரக நிலைகள் உணர்த்துகின்றன.

மாணவ – மாணவியர்: இம்மாதம் முழுவதும் கல்வித் துறைக்கு ஆதிபத்தியம் கொண்டுள்ள அனைத்து கிரகங்களும் உங்களுக்குச் சாதகமாக சஞ்சரிக்கின்றனர். படிப்பில் சிறந்த முன்னேற்றம் ஏற்படும். தேர்வுகளில் சரியான பதிலளித்து, நல்ல மதிப்பெண்கள் பெறுவதற்கு ஏற்ற மாதம் இது. வெளிநாடு சென்று, விசேஷ உயர் கல்வி பெறவேண்டுமென்ற ஆர்வமிருப்பின், அதற்கான முயற்சிகளில் இப்போது ஈடுபடலாம். கல்வி உதவித் தொகை கிடைப்பதற்கும் கிரக நிலைகள் உதவிகரமாக அமைந்துள்ளன. இது ஓர் அரிய சந்தர்ப்பம். பயன்படுத்திக்கொள்ளுங்கள்!

விவசாயத் துறையினர்: பாக்கிய ஸ்தானத்தில் ராகு, செவ்வாய் இணைந்துள்ளனர்! வைகாசி 18-ம் தேதி செவ்வாய், தனது ஆட்சி வீடான மேஷத்திற்கு மாறுவது மிக நல்ல கிரக மாறுதலாகும். அரசாங்க நிதியுதவி, புதிய சலுகைகள் ஆகியவற்றை இம்மாதம் எதிர்பார்க்கலாம். விவசாயப் பணிகளில் நவீன உபகரணங்களைப் புகுத்துவதற்கு சாதகமான மாதம். பழைய கடன்களை அடைத்து, நிம்மதி பெற முடியும்.

பெண்மணிகள்: குரு, சுக்கிரன் இருவருமே உங்கள் பக்கம் நிற்பதால், மகிழ்ச்சிக்கும், மன நிறைவிற்கும் குறையிராது. குடும்பச் சூழ்நிலை மன நிறைவையளிக்கும். அஷ்டமச் சனியினால், அவ்வப்போது மாதவிடாய்ப் பிரச்னை, ஒற்றைத் தலைவலி, வயிற்று வலி, கிறுகிறுப்பு, ரத்த அழுத்தம், சிறுநீரகக் கற்கள் ஆகியவற்றால், உபாதைகள் ஏற்படும். எளிய மருத்துவ சிகிச்சையினால் குணம் கிட்டும்.

அறிவுரை: மனதை அமைதியாக வைத்துக்கொள்ளுங்கள். அவசியமானால் தவிர, வெயிலில் அலைவதைத் தவிர்க்க வேண்டும்.

பரிகாரம்: சனிக்கிழமைதோறும், மாலையில் அருகிலுள்ள திருக்கோயில் ஒன்றில் மண் அகலில் நல்லெண்ணெய் தீபம் ஏற்றி வைத்துவிட்டு, தரிசித்துவிட்டு வரவும். மிகச் சிறந்த பரிகாரமாகும்.

அனுகூல தினங்கள்: வைகாசி: 1, 2, 6-9, 13-15, 19, 20, 25-27, 31, 32.

சந்திராஷ்டம தினங்கள்: வைகாசி: 16 இரவு முதல், 18 இரவு வரை.

 

Dinakaran- astrology-logo

Dinakaran is a Tamil daily newspaper distributed in India. As of March 2010, Dinakaran is the largest Tamil daily newspaper in terms of net paid circulation, which was 1,235,220. In terms of total readership, which was 11.05 Lakhs as of May 2017, it is the second largest. Dinakaran is published from 12 centers in India namely Delhi, Mumbai, Chennai, Bengaluru, Madurai, Coimbatore, Trichy, Salem, Nagercoil, Vellore, Nellai and Pondicherry.

Download Our Apps

Follow Us