(உத்திரம் 2ம் பாதம் முதல் அஸ்தம், சித்திரை 2ம் பாதம் வரை)
17-8-2024 முதல் 16-9-2024 வரை
குடும்பம்: பெரும்பான்மையான கிரகங்கள் உங்களுக்கு அனுகூலமாக சஞ்சரிக்கின்றனர், இம்மாதம் முழுவதும். சூரியன், செவ்வாய், ராகு ஆகிய மூவர் மட்டும் உங்களுக்கு ஆதரவாக இல்லை. மற்ற கிரகங்களினால், பல நன்மைகள் ஏற்படவுள்ளன. வருமானம் திருப்திகரமாக உள்ளது. எதிர்பாராத பண வரவிற்கும் சாத்தியக்கூறு உள்ளது. பாக்கிய ஸ்தானத்தில் குரு அமர்ந்து, ராசியையும், ராசிக்கு பூர்வ புண்ணிய ஸ்தானமாகிய மகரத்தையும் பார்ப்பதால், குடும்பத்தில் ஒற்றுமை நிலவும். ராகுவின் நிலையினால், மனைவியின் ஆரோக்கியம் சிறிது பாதிக்கப்படும். திருமண முயற்சிகள் கைகூடும். வேலைக்கு முயற்சித்துவரும் பெண் அல்லது பிள்ளைக்கு நல்ல வேலை கிடைக்கும். கும்ப ராசியில், சனி பகவான் சுப பலம் பெற்றிருப்பதால், பழைய கடன்களை அடைப்பதற்கு வழிபிறக்கும். ஸப்தம (7) ஸ்தானத்தில் ராகு நிலைகொண்டிருப்பதால், மனைவியின் ஆரோக்கியத்தில் கவனமாக இருத்தல் மிகவும் அவசியம். குரு, சுக்கிரன் ஆகியோரின் சஞ்சார நிலைகளினால், பலருக்கு வசதியான வீட்டிற்கு மாற்றம் ஏற்படும்.
உத்தியோகம்: ஜீவன காரகரான சனி பகவான், சுப பலம் பெற்றுள்ள நிலையில், சனி மற்றும் குரு ஆகிய கிரகங்கள் உதவிகரமாக சஞ்சரிப்பதால், பதவியுயர்வு, ஊதிய உயர்வு, விருப்பப்பட்ட இடத்திற்கு மாற்றல் எதிர்பார்க்கலாம். மேலதிகாரிகளின் ஆதரவு மகிழ்ச்சியையும், மனநிறைவையும் தரும். சக-ஊழியர்கள் ஒத்துழைப்பார்கள். வெளிநாடு சென்று பணியாற்ற விருப்பமிருப்பின், முயற்சிக்கலாம். வெற்றி கிட்டும். எனினும், இடைத்தரகர்களை நம்பி, ஏமாந்துவிடவேண்டாம்.
தொழில், வியாபாரம்: குரு, சனி மற்றும் சுக்கிரன் ஆகிய மூவரும் உங்களுக்குச் சாதகமாக நிலைகொண்டுள்ளனர். சந்தை நிலவரம் இம்மாதம் முழுவதும் அனுகூலமாக உள்ளது. நிதிநிறுவனங்களின் ஆதரவு உற்சாகத்தை அளிக்கும். வெளிமாநிலங்களிலிருந்து, அதிக அளவில் ஆர்டர்கள் கிடைப்பது மகிழ்ச்சியளிக்கும். வெளியூர்ப் பயணங்கள், புதிய ஆர்டர்களைப் பெற்றுத் தரும். உங்கள் விற்பனை நிலையங்களை விரிவுபடுத்துவதற்கு ஏற்ற மாதம் இது. அளவோடு புதிய முதலீடுகளில் ஈடுபடுவதற்கு ஏற்ற மாதம் இது. ஏற்றுமதித் துறையினருக்கு, அந்நிய நாடுகளிலிருந்து புதிய ஆர்டர்கள் கிடைப்பதால், புதிய கிளைகளைத் திறக்கலாம்.
கலைத்துறையினர்: சுக்கிரன், புதன் மற்றும் குரு ஆகிய மூன்று கிரகங்களுக்கும், கலைத் துறையில் ஆதிக்கம் உள்ளது. இவை மூன்றும் சுப பலம் பெற்று சஞ்சரிப்பதால், புதிய வாய்ப்புகள் தேடி வரும். அலங்காரப் பொருட்கள், அழகுக்காக வீடுகளில் வைக்கும் பொம்மைகள் செய்வோர், சிற்பிகள் ஆகியோருக்கு லாபகரமான மாதமாகும். சிறிது சிறிதாக அழிந்து வரும் கலைநயமிக்க சிற்பக் கூடங்கள்கூட புத்துயிர் பெறும். வாடி, வதங்கிக் கொண்டிருக்கும் திரைப்படத் துறையினருக்கு, பெரிய அளவில் புதிய வாய்ப்புகள் உருவாகும். தமிழக அரசு, புராதனக் கோயில்களின் புனரமைப்பு தீவிரமாகவும், பெரிய அளவிலும் ஈடுபட்டு வருவதால், திருக்கோயில்கள் சம்பந்தப்பட்ட சிற்பிகளுக்கு நல்ல வாய்ப்புகள் தேடிவரும். திருக்கோயில்களின் நிர்மானத்தில், தமிழகம் தனிச் சிறப்பு பெற்றுள்ளதை உலகம் அறியும். இம்மாதம் சிற்பிகளுக்கு யோக பலன்களைப் பெற்றுத் தரும்.
அரசியல் துறையினர்: சுக்கிரன், புதன் மற்றும் சனி பகவான் ஆகிய மூவரும் உங்களுக்கு ஆதரவாக சுப பலம் பெற்றிருப்பதால், மிகச் சிறந்த முன்னேற்றம் காத்துள்ளது உங்களுக்கு. பலருக்குக் கட்சியில் புதிய பதவியேற்கும் வாய்ப்பு உள்ளது. மேலிடத் தலைவர்களின் ஆதரவும், மக்களிடையே செல்வாக்கும் துணை நிற்கின்றன. தசா, புக்திகள் சுப பலம் பெற்றிருப்பின், கட்சியிலோ அல்லது அரசாங்கத்திலோ புதிய பதவியொன்றை ஏற்பதற்கும் சாத்தியக்கூறு உள்ளதை கிரக நிலைகள் தெளிவாக எடுத்துக்காட்டுகின்றன.
மாணவ – மாணவியர்: இம்மாதம் முழுவதும் வித்யா காரகரான புதன், சுப பலம் பெற்றுத் திகழ்வதுடன், புதனின் வீட்டிற்கு, குரு பகவானின் சுபப் பார்வை கிடைப்பதாலும், படிப்பில் முன்னணியில் இருப்பீர்கள். தேர்வுகளில் நல்ல மதிப்பெண்களைப் பெறுவீர்கள். பலருக்கு, நேர்முகத் தேர்வில் வெற்றி கிட்டும். வெளிநாடு சென்று, விசேஷ உயர் கல்வி பயிலும் ஆர்வமிருப்பின், அதற்கான திட்டங்களை இம்மாதம் வகுக்கலாம்.
விவசாயத் துறையினர்: விளைச்சலும் வருமானமும், திருப்திகரமாக இருக்கும். கால்நடைகளின் பராமரிப்பில் பணம் சற்று அதிகமாகவே விரயமாகும். தண்ணீர், உரம், இடுபொருட்கள் போன்ற அடிப்படை வசதிகள் எளிதில் கிடைக்கும். பழைய கடன்கள் இருப்பின், அவற்றில் ஓர் பங்கை அடைத்து, நிம்மதி பெற முடியும்.
பெண்மணிகள்: குரு, சுக்கிரன் ஆகிய இரு கிரகங்களுமே உங்களுக்கு ஆதரவாக சுப பலம் பெற்றுத் திகழ்கின்றனர். குடும்ப வாழ்க்கை மன நிறைவைத் தரும். நெருங்கிய உறவினர்களிடையே சுமுகமான உறவு நீடிக்கும். விவாகத்திற்குக் காத்திருக்கும் பெண்களுக்கு நல்ல வரன் அமையும். பாக்கிய ஸ்தானத்தில் குரு அமர்ந்திருப்பதாலும், சுக்கிரனும் அனுகூலமாக விளங்குவதாலும், புதிய ஆடை, ஆபரணங்கள் வாங்கும் யோகமும் உள்ளது.
அறிவுரை: சிக்கனமாக செலவு செய்து, எதிர்காலத்திற்கென்று சேமித்து வைத்துக்கொள்ளுங்கள். பணம் வருகிறதே என்று, அதனை விரயம் செய்துவிட வேண்டாம்.
பரிகாரம்: ஸப்தம ஸ்தானத்தில் (7), ராகு பலத்துடன் சஞ்சரிப்பதால், திருநாகேஸ்வரம் திருத்தல தரிசனம், தோஷத்தைப் போக்கி, நல்ல பலனைத் தரும். திருக்கோயிலுக்குச் செல்லும்போது, பசு நெய் அல்லது செக்கிலாட்டிய நல்லெண்ணெயுடன்கூடிய மண் அகல் விளக்கையும் எடுத்துச்செல்ல மறவாதீர்.
அனுகூல தினங்கள்
ஆவணி: 1, 3-6, 13-16, 21-23, 27-29.
சந்திராஷ்டம தினங்கள்
ஆவணி: 7 பின்னிரவு முதல், 9 வரை.
