மகரம்

14-5-2024 முதல் 14-6-2024 வரை

(உத்திராடம் 2ம் பாதம் முதல் திருவோணம், அவிட்டம் 2ம் பாதம் வரை)

குடும்பம்: குரு, சுக்கிரன், செவ்வாய், ராகு ஆகியோர் சுபத்துவப் பாதையில் சஞ்சரிக்கின்றனர். மேலும், ராசிக்கு குரு பகவானின் சுபப் பார்வை கிடைக்கிறது, இம்மாதம் முழுவதும்!! ஏழரைச் சனியின் கடைசிப் பகுதி நடைபெறுகிறது! வருமானம் போதிய அளவிற்கு உள்ளது. தன ஸ்தானத்தில் சனி பகவான் அமர்ந்துள்ளதால், வரவிற்கு ஏற்ற செலவுகளும் இருக்கும். குரு பகவான், பூர்வ புண்ணிய ஸ்தானத்தில் அமர்ந்து, ஆத்மகாரகரான சூரியனிடம் இணைந்திருப்பதால், பாடல்பெற்ற திருத்தல தரிசனம் ஒன்று கிடைப்பதற்கு சாத்தியக்கூறு உள்ளது. மனம் ஆன்மிக விஷயங்களில் தீவிரமாக ஈடுபடும். மகான்கள், பொரியோர்களின் ஆசி கிட்டும். குழந்தைகளின் கல்வியில் நல்ல முன்னேற்றத்தைத் தந்தருள்வார், குரு பகவான்! ஆரோக்கியம் திருப்திகரமாக இருக்கும். குரு பலம் சிறப்பாக இருப்பதால், திருமண முயற்சிகளில் மிக நல்ல வரன் அமையும். தற்கால தசா, புக்திகள் சுப பலம் பெற்றிருப்பின், அத்தகைய பெண்மணிகளுக்கு, கருத்தரிக்க ஏற்ற மாதம் இந்த வைகாசி. குழந்தைகளின் கல்வி முன்னேற்றம் மகிழ்ச்சியை அளிக்கும். கர்ப்பிணிப் பெண்களுக்கு சுபப் பிரசவம் ஏற்படும். பெரியோர்கள், மகான்களின் ஆசி கிட்டும். வெளிநாடுகளில் பணியாற்றிவரும் பிள்ளை அல்லது பெண்ணிடமிருந்து, பெற்றோர்களுக்கு பணம் கிடைப்பது மகிழ்ச்சியையும், மன நெகிழ்ச்சியையும் அளிக்கும். சொத்து, பாகப்பிரிவினை சம்பந்தமான வழக்குகள் பரஸ்பர சமரசத்தில் முடியும் என்பதை செவ்வாயின் நிலை எடுத்துக்காட்டுகிறது.

உத்தியோகம்: உத்தியோகத்தில் மிகச் சிறந்த முன்னேற்றம் ஏற்படும். அலுவலகத்தில் அனைவரின் ஆதரவும் ஒத்துழைப்பும் கிடைப்பது, மன நிறைவையும், உற்சாகத்தையும் அளிக்கும். மகரமும், சனி பகவானின் ராசியாகும். ஆதலால், ஏழரைச் சனிக் காலத்தில், சிரமங்கள் கடுமையாக இருந்திருக்காது. இதனை மிகப் புராதன ஜோதிடக் கிரந்தமான, “பூர்வ பாராசர்யம்”, உதாரணத்துடன் அற்புதமாக விளக்கியுள்ளது. முன்கோபமுள்ள தாய், தன் குழந்தை மீது அக்கோபத்தைக் காட்டமாட்டாள் அல்லவா? அதேபோன்றுதான், மகரம், கும்பம், துலாம் ஆகிய மூன்று ராசியினருக்கும், ஏழரைச் சனியின்போது சனியின் தாக்கம் குறைவாகவே இருக்கும் என்பதையும் அந்நூல் விவரித்துள்ளது.

தொழில், வியாபாரம்: போட்டிகளும், சந்தை சூழ்நிலைகளும் பிரச்னைகளை ஏற்படுத்தினாலும், உங்கள் வியாபாரம் சிறிதளவும் தடைபடாது. லாபம் உயரும் கூட்டாளிகள் ஒத்துழைப்பார்கள். வெளிமாநில பயணங்கள், விற்பனையை அதிகரிப்பதற்கு உதவிகரமாக இருக்கும். வரவேண்டிய பாக்கிகள் வசூலாகும். விஸ்தரிப்புத் திட்டங்களில் அளவோடு முதலீடு செய்யலாம்.

கலைத்துறையினர்: இம்மாதம் முழுவதும் ஏதாவதொரு புதிய வாய்ப்பு வந்துகொண்டேயிருக்கும். அதனால், வருமானமும் உயரும். மக்களிடையே மேலும் பிரபலமடைவீர்கள். திரைப்படத் துறையினர் புதிய திரைப்படங்கள் வெளிக்கொணர்வதில் தங்கள் கவனத்தைச் செலுத்தலாம். லாபகரமாகவும் இருக்கும் என கிரக நிலைகள் உறுதிசெய்கின்றன

அரசியல்துறையினர்: கட்சிப் பிரச்னைகள் கவலையை அளிக்கும். உயர்மட்டத் தலைவர்களுக்கும், உங்களுக்கும் இடையே கருத்துவேற்றுமை ஏற்படும். எந்நிலையிலும், சிந்தித்து முடிவெடுப்பது உங்கள் எதிர்கால நலனுக்கு நன்மை செய்யும்.

மாணவ – மாணவியர்: வைகாசி 10-ம் தேதி வரை கிரக நிலைகள் சாதகமாக உள்ளன. படிப்பில் நல்ல முன்னேற்றம் ஏற்படும். அதன்பிறகு, சிறு உடல்நலக் குறைவினால், படிப்பில் கவனக் குறைவு ஏற்படக்கூடும். எளிய சிகிச்சையினால், குணம் கிடைக்கும்.

விவசாயத் துறையினர்: வைகாசி 17-ம் தேதி வரை, வருமானம் திருப்திகரமாக இருக்கும். விளைச்சலும் மகிழ்ச்சியைத் தரும். அடிப்படை வசதிகளுக்குக் குறைவிராது. வைகாசி 18-ம் தேதியிலிருந்து கிரக நிலைகள் மாறுவதால், வயல் பணிகளில் பிரச்னைகள் ஏற்படும். கால்நடைகளின் பராமரிப்பில் அதிக செலவுகள் ஏற்படும். பழைய கடன்கள் கவலையை அளிக்கும்.

பெண்மணிகள்: குரு, சுக்கிரன் ஆகிய இருவருமே உங்களுக்கு அனுகூலமாக சஞ்சரிக்கின்றனர். பெரும்பான்மையான மற்ற கிரகங்களும் உங்கள் பக்கம்தான். உங்கள் விருப்பங்கள் அனைத்தும் நிறைவேறும். திருமணத்திற்குக் காத்திருக்கும் கன்னியருக்கு மிக நல்ல வரன் அமைந்து, விவாகமும் நடைபெறும். வேலைக்கு முயற்சித்துவரும் பெண்மணிகளுக்கு, மனத்திற்குப் பிடித்த வேலை கிடைக்கும். ஏற்கெனவே வேலைபார்த்துவரும் கன்னியருக்கு, ஊதிய உயர்வும் புதிய சலுகைகளும் கிடைப்பதற்கு வாய்ப்புகள் உள்ளதை சம்பந்தப்பட்ட கிரகங்கள் உணர்த்துகின்றன.

அறிவுரை: சூரியனின் சஞ்சார நிலையினால், உடல் ஆரோக்கியம் பாதிக்கப்படுவதற்கு சாத்தியக்கூறு உள்ளது. கூடியவரையில், பகல் வேளையில், வெளிச் செல்வதையும், அலைவதையும் குறைத்துக் கொள்ளவேண்டும். அதிக உஷ்ணத்தினால், உடல்பாதிப்பு ஏற்படக்கூடும் என்பதை கிரக நிலைகள் எச்சரிக்கை செய்கின்றன.

பரிகாரம்: சூரியனார்க் கோயிலுக்குச் சென்று, நெய் தீபம் ஏற்றிவைத்து தரிசித்துவிட்டு வருவது, மிகச் சிறந்த பரிகார பலனையளிக்கும்.

அனுகூல தினங்கள்:
வைகாசி: 1, 5-10, 14-16, 20, 24-28.

சந்திராஷ்டம தினங்கள்:
வைகாசி: 2 மாலை முதல், 4 வரை.
மீண்டும் 29 பின்னிரவு முதல், 32 பிற்பகல் வரை.

Dinakaran- astrology-logo

Dinakaran is a Tamil daily newspaper distributed in India. As of March 2010, Dinakaran is the largest Tamil daily newspaper in terms of net paid circulation, which was 1,235,220. In terms of total readership, which was 11.05 Lakhs as of May 2017, it is the second largest. Dinakaran is published from 12 centers in India namely Delhi, Mumbai, Chennai, Bengaluru, Madurai, Coimbatore, Trichy, Salem, Nagercoil, Vellore, Nellai and Pondicherry.

Download Our Apps

Follow Us